TOPICS:
Literature
|
Philippine Folklores | Short
Stories | Novel | Salawikain
| Bugtong | Prose
& Poetry |
PROSE &
POETRY
Aking Bayan
Jose Corazon
de Jesus
Mga ibong lumilipad na buhat kung saang dako,
Kung galing
sa aking bayan, alam ko ang balahibo;
Pati mga naglalarong magagandang paruparo,
Kung galing sa aking bayan ay kilalang-kilala ko!
At ang tubig na malinis
at matamis at malinaw,
ito'y doon din sinalok sa pansol ng aming bayan;
pati Araw, pati langit, pati hanging nagdaraan,
ay may bayang sinasabing
walang laya sa silangan!
"Kababayan!"... isang bating kung marinig
mo sa hirap,
panyong puti sa luha, puting bulak kung sa sugat;
ang lahat
ng bagay wari kung sa bayan nagbubuhat,
sa taginting at sa ubod, may pagsintang
nangungusap!
Kapag ikaw'y nalalayo sa bayan mong kaawawa,
lalo't lalong
lumalaki ang pag-ibig mong dakila;
kantahin lang sa malayo ang kundimang
lumuluha,
ikaw naman sa lungkot mo'y luluha nang parang bata!
Ang
bayan ay isang mutya na hindi mo namamalas
hangga't ikaw'y nakalapit at sa
kanya'y naghihirap
ang bandilang pilipino sa malayo kung iladlad,
habang
kinakawayan ka, ang luha mo'y nalalaglag!
Ang bayan ay sadyang ganyan,
mahirap man kahit munti,
kausap mo't kaulayaw sa malungkot na sandali;
kung ang baya'y nananangis at laya ang hinihingi,
kay-tamis nang makidigma
at kay-tamis nang masawi!
Sa bayn mo nakatayo ang tahanang sinilangan,
sa bayan mo nakilala ang irog mong paraluman,
sa bayan mo nagsitanda ang
dakila mong magulang:
bayan, irog, ama't ina, buhay at kamatayn!
Kapag
iyong natanaw nang ang dayuha'y lumulusob,
kapag iyong nakita nang ang dampa
mo'y pinapasok,
gaano ang kamatayang hindi natin malilimot
sa ngalan
ng isang ina, isang baya't isang irog?
Ang Agilang lumilipad kung may tangay
na bandila,
ang sigaw mo sa pagtutol ay aabot kay Bathala;
at kung ikaw
ay gapos na, nagigitgit, walang laya,
ngangatngatin mo ang iyong hila-hilang
tanikala!
Sa paglusob ay sabihin, "hindi kayo magdaraan...!"
Kung mag-apoy na ang digma, sa bunton ng mga patay,
diyan, bayan, sisilang
ka na ang dala mo'y tagumpay,
may paglayang nasa dibdib, may bandilang nasa
kamay!
